Photo - Club Schëffleng
A.s.b.l. Nummer RCS F10876
Siège social : 1, rue du Moulin L-3857 Schëffleng
IBAN LU46 0019 7755 1136 6000 bei der BCEE
Provisoresche Studio : an der “Albert Wingert Schoul”, rue Michel Rodange zu Schëffleng
Eis Geschicht
Den 28. Mee 1934 hu sech aacht begeeschtert Photosamateuren zu Schëffleng zesummegedoe fir de Schëfflenger Photosclub ze grënnen.
Si hate gläich begraff, datt et de Sënn vun engem Club ass, senge Membere mat Rot an Dot bäizestoen an hinnen d’Méiglechkeet ze ginn an engem Clublokal hirem Hobby nozegoen.
Dobäi gëllt et net nëmme Photoen ze knipsen, neen, si mussen och duerchdiskutéiert a kritiséiert ginn, fir datt se méi Ausso- an Ausdrockskraaft kréien, fir datt se op nationalem an internationalem Plang bestoe kënnen.
Dofir muss de Photosamateur d’Theorie kennen, grouss Meeschtere studéieren an natierlech selwer vill praktesch schaffen.
All dës Aktivitéite sollen an engem komerodschaftleche Clubgeescht oflafen, wou och den Amusement net ze kuerz dierf kommen. Dës Grondiddie vun deemools, déi d’Liewe vun engem Photoclub ausmaachen, zielen och haut nach am „Photo – Club Schëffleng“.
De PCS war ëmmer ee vun deenen éischte Clibb, dee senge Memberen all wichteg Neierungen, fir an der Photographie ze schaffen, ugebueden huet.
Sou och haut, am digitalen Zäitalter.
2014 hu mer de 80. Anniversaire vum Club mat enger Porte ouverte an eisem Studio gefeiert.
2016 hu mer eis Statuten iwwerschafft an opgefrëscht.
Eis Aktivitéiten
All Amateur vu Photoen, egal op bluddegen Ufänger oder méi erfuerene Photograph, ass bei eis wëllkomm. Et spillt och keng Roll wat fir een Equipement een huet.
Photographen, déi nach gären analog schaffe, fanne bei eis och hiert Gléck. Mer hunn an eisem Studio eng Donkelkummer fir schwaarz / wäiss a faarweg Photoen.
Mer probéieren eise Programm sou opzesetzen, datt mer all Member eppes kënnen ubidden.
Dat si grondsätzlech:
Aktivitéien am Studio, wéi z.B.
- Model – Shooting
- Objekt – Photographie
- Highspeed – Photographie
- Formatiounen
- Schaffen an der Donkelkummer
Sortien; wéi z.B.
- an d‘Natur
- op Belval
- op de Kierchbierg
- op de Carnaval vénitien zu Lonkesch
Visitten, wéi z.B.
- de Musée des Mines zu Rëmeleng
- d‘Abtei zu Orval
- de Flughafe vu Saarbrécken
- d‘Ateliere vun der CFL
Photoe no verschiddenen Themen
- do kënnen eis Memberen onofhängeg photographéieren
Ausstellungen
- de PCS huet eng permanent Photosausstellung an der aler Agence vun der BCEE zu Schëffleng
Participatioun bei verschidden Evenementer, wéi z.B.
- Concoursen
- d‘Journée Télévie zu Schëffleng
- d‘Fête de la Photographie organiséiert vun der FLPA
D‘Photoe vun eisen Aktivitéiten ginn op eisem Site publizéiert.
Do bidde mer eise Memberen och d‘Méiglechkeet un, fir sech selwer an hir schéinste Photoen ze presentéieren.
Eis Clubowender
Am Prinzip 2 x am Mount Donneschdes ëm 19.00 (ausser an der Summervakanz) an eisem Studio.
Den detailléierte Programm vun all eisen Aktivitéite gëtt reegelméisseg op dësem Site publizéiert.
Eis Memberen hale mer och iwwer den elektronesche Wee stänneg um Lafenden.